कम्युनिस्ट युटोपिया र न्युक्लियर बंकरको यात्रा

क्राको सहरको सडकमा घिस्रिन थाल्यो ट्राम। झ्यालबाट बाहिर दौडिन थाले मेरा आँखा। ट्रामको गतिसँगै दौडिरहेका छन् दृश्यहरू। सहरका भिड र हल्लाहरू पछाडि छुटे। ओझेलमा परे क्राकोका साँघुरा गल्लीहरू। गोथिक चर्चका चुचुराहरू र मध्ययुगीन भवनहरू हराए। देखिन थाले फराकिला बाटा र एकै किसिमका भवनहरू।

छोटो समयमा म अर्कै संसारमा पुगेको छु। त्यो संसार हो कम्युनिस्टहरूको आदर्श समाजवादी सहर। पोल्यान्डको क्राको सहरसँग जोडिएको नोवा हुता यस्तो सहर थियो, जसलाई कम्युनिस्ट शासकहरूले आफ्नो ‘आदर्शलोक’ अर्थात् युटोपियाको रूपमा निर्माण गरेका थिए। त्यसलाई रामराज्यको रूपमा कल्पना गरेका थिए। कम्युनिस्ट शासकहरूले देखेका थिए, त्यहाँ काल्पिनक स्वर्गको सपना। ट्रामबाट उत्रेर टेकेको छु नोवा हुताको चोकमा। विशाल चोकबाट पाँचवटा चौडा सडक पाँच दिशामा फैलिएका छन्। ती सडक यति फराकिला छन् कि एकैपटक हजारौं मानिसले जुलुस गर्न सकून् भनेर बनाएकोजस्तो। विशाल चोक छ, जहाँ ठुलो राजनीतिक सभा, सैनिक परेड र मजदुरका कार्यक्रम आयोजना गर्न सकियोस् भनेर बनाएजस्तो। एक अर्कासँग मिल्दाजुल्दा भव्य आवाशगृहहरू छन्, कम्युनिस्टहरूको समानता कस्तो हुन्छ भनेर देखाउन खोजेजस्तो।