देउवा समूहको सर्त– वार्ता गर्न गगन आफैँ आऊन्

नेपाली कांग्रेसले मध्यमार्गी नेता शेखर कोइरालापछि पूर्वसभापति शेरबहादुर देउवा समूहसँग वार्ता थालेको छ। महामन्त्री गुरुराज घिमिरेले यस क्रममा मंगलबार निवर्तमान उपसभापति पूर्णबहादुर खड्का र नेता कृष्णप्रसाद सिटौलासँग भेट गरे।

घिमिरे खड्का र सिटौलालाई भेट्न उनीहरूकै निवास पुगेका थिए। संस्थापन पक्षले १५औँ महाधिवेशनको तयारी थाल्दा इतर समूह गम्भीर मतभेद राख्दै प्रक्रियामा सामेल नभइरहेको अवस्थामा घिमिरेले वार्ता थालेका हुन्। घिमिरेले गत शुक्रबार (१२ असारमा) मध्यमार्गी नेता कोइरालासँग भेटवार्ता गरेका थिए।