साहित्यमा नोबेल पुरस्कार कसरी छनोट हुन्छ ?

साहित्यतर्फको नोबेल पुरस्कार विजेता छनोट प्रक्रिया लामो अध्ययन, मूल्याङ्कन, छलफल र मतदानमा आधारित हुन्छ। पुरस्कारका लागि विश्वभरबाट आएका करिब २२० नामबाट सुरु हुने प्रक्रिया अन्ततः पाँच जना लेखकको छोटो सूचीमा पुग्छ। त्यसपछि उनीहरूका साहित्यिक कृतिको गहन अध्ययन गरेर विजेता छनोट गरिन्छ।

स्विडिस एकेडेमी तथा नोबेल समितिकी सदस्य र लेखिका एलेन म्याटसनका अनुसार साहित्यतर्फको नोबेल पुरस्कार प्रदान गर्दा लेखकको व्यक्तिगत जीवनभन्दा साहित्यिक गुणस्तरलाई प्राथमिकता दिइन्छ। उत्कृष्ट साहित्य लेख्नु नै पुरस्कारका लागि सबैभन्दा महत्त्वपूर्ण आधार हो।