पुस्तक चर्चा : उद्बोधक उच्छलनले भरिएको हरि दाइको ‘अन्तर्य’

वरिष्ठ अधिवक्ता हरिप्रसाद उप्रेती कानुन व्यवसाय जगत्मा एक परिचित नाम हो । ताप्लेजुङको ढुङ्गेसाँघु जहाँ मदन भण्डारीको जन्म भएको थियो, त्यहीँ जन्मनुभएको रहेछ हरि दाइ । ताप्लेजुङको कठिन भूबनावटको कारण जीवनका दैनिकीहरुमा कठिनाइ भएरै होला, उहाँका बुबा प्रतिमान उप्रेतीले आफ्नो बसाइँ सराइ झापाको सुरुङ्गामा गर्नुभएको रहेछ । हरि दाइको बाल्यकाल, पढाइ–लेखाइ सुरुङ्गामा नै भएको पाइयो । झापामा विद्यालय तहको पढाइ सकेर उच्च शिक्षाको लागि उहाँ धरान हुँदै काठमाडौंमा आएर पढ्नुभएको रहेछ ।

सानैदेखि एक इमानदार व्यक्तिको भूमिका निभाएका हरि दाइमा सधैँ मेहनत गरेर खानुपर्दछ भन्ने सोचको विकास भएको रहेछ । उहाँले आफ्नो जीवनमा भोगेका घटना विवरणहरु समेटेर लेख्नुभएको ‘अन्तर्य’ मैले शुरुदेखि अन्त्यसम्म पढेँ । जीवनका उकाली, ओराली, भन्ज्याङ अनि चौतारीमा भोगेका भोगाइहरु सिलसिलेवार ढंगबाट उहाँले लिपिबद्ध पार्नुभएको छ । ‘अन्तर्य’ पढ्दा कतै आफ्नै जिन्दगीको भोगाइ पो हो कि, केवल पात्रमात्र फरक पो हुन् कि जस्तो लाग्छ ।