विश्वकप : कसैको पहिलो, ब्राजिलको  २३औं यात्रा

विश्व फुटबलको सबैभन्दा ठूलो उत्सव हो, फिफा विश्वकप । जसको २३औं संस्करण बिहीबार रातिदेखि उत्तर अमेरिकामा सुरु हुँदैछ । अमेरिका, क्यानडा र मेक्सिकोले संयुक्त रूपमा आयोजना गर्ने यो विश्वकप धेरै अर्थमा ऐतिहासिक बनेको छ । पहिलोपटक ४८ राष्ट्र सहभागी विश्वकपमा उज्वेकिस्तान, जोर्डन, केप भेर्दे र कुरासाओले डेब्यु गर्दै छन् भने ५ पटकको विश्वविजेता ब्राजिलले लगातार २३औं संस्करणमा सहभागिता जनाउँदै आफ्नो अद्वितीय कीर्तिमानलाई निरन्तरता दिनेछ । तीन देशका १६ सहरमा हुने रोमाञ्चक १ सय ४ खेलपछि एक टोलीले विश्व फुटबलको सर्वोच्च उपाधि उचाल्ने छ ।

काठमाडौं/अमेरिका : फिफा विश्वकपको इतिहासमा पहिलोपटक तीन देशले संयुक्त रूपमा आतिथ्यता गर्दै १६ सहरमा हुने विश्वकप फुटबलको २३औं संस्करण जुन ११ बाट सुरु हुँदैछ। जहाँ ४ देशले पहिलोपटक विश्वकपमा सहभागिता जनाउँदा सर्वाधिक विश्वकपको उपाधि जितेको ५ पटकको विश्वविजेता ब्राजिलको यो लगातार २३औं संस्करणमा सहभागिता हुनेछ।