बैतडी प्रशासनमा एकद्वार सेवा प्रणाली लागू

जिल्ला प्रशासन कार्यालय बैतडीले सेवा प्रवाहलाई सहज, छरितो तथा नागरिकमैत्री बनाउन ‘एकद्वार सेवा प्रणाली’ लागू गरेको छ। प्रणाली लागू भएसँगै नागरिकता, राहदानीलगायतका महत्त्वपूर्ण सेवाहरू एउटै स्थानबाट उपलब्ध हुन थालेका छन्।

एकद्वार प्रणालीमार्फत सेवाग्राहीले विभिन्न शाखा धाउनुपर्ने झन्झटबाट मुक्ति पाएका छन्। सेवाग्राहीलाई आवश्यक जानकारी तथा सहजीकरणका लागि कार्यालयमा सहायता कक्षसमेत सञ्चालनमा ल्याइएको छ। सार्वजनिक सेवालाई थप प्रभावकारी, पारदर्शी र सेवाग्राहीमैत्री बनाउने उद्देश्यले उक्त प्रणाली कार्यान्वयनमा ल्याइएको कार्यालयले जनाएको छ।

बैतडीका प्रमुख जिल्ला अधिकारी डा. डिजन भट्टराईले शान्ति–सुरक्षा कायम गर्नुका साथै नागरिकको आवश्यकतालाई केन्द्रमा राखेर सेवा प्रवाह सुधार गर्न एकद्वार सेवा प्रणाली लागू गरिएको बताउनुभयो। टाढाबाट आउने सेवाग्राहीको समय बचत गर्ने, अपाङ्गता भएका व्यक्तिलाई सहज सेवा उपलब्ध गराउने तथा नागरिकलाई झन्झटरहित सेवा प्रदान गर्ने उद्देश्यले प्रणाली सञ्चालनमा ल्याइएको उहाँको भनाइ छ।

उहाँका अनुसार गृहमन्त्रालयको सचिवस्तरीय निर्णयअनुसार केही जिल्लामा कार्यान्वयनमा रहेका अभ्यासलाई संस्थागत गर्दै टोकन प्रणाली, नागरिक सुनुवाइ, अनलाइन सिफारिस तथा निःशुल्क सहायता कक्षसहितको एकद्वार सेवा प्रणाली लागू गरिएको हो।

प्रमुख जिल्ला अधिकारी भट्टराईले कर्मचारीले सेवाग्राहीसँग मर्यादित र सम्मानजनक व्यवहार गर्नुपर्नेमा जोड दिँदै कुनै पनि प्रकारको दुर्व्यवहारप्रति ‘शून्य सहनशीलता’ को नीति अपनाइएको बताउनुभयो। सेवाग्राहीलाई दुःख दिने वा अमानवीय व्यवहार गर्ने कर्मचारीमाथि कानुनबमोजिम कारबाही गरिने उहाँले स्पष्ट पार्नुभयो।

एकद्वार सेवा प्रणाली लागू भएपछि सेवा लिन सहज भएको सेवाग्राहीहरूले बताएका छन्। सिगास गाउँपालिका–५ की डम्मरी महराले पहिले विभिन्न शाखा र झ्यालमा धाउनुपर्दा धेरै समय खर्च हुने गरे पनि अहिले एउटै स्थानबाट सेवा प्राप्त गर्न सकिएको बताउनुभयो।

“पहिले यो झ्याल र उ झ्याल गर्दै समय बित्थ्यो, अहिले भने आवश्यक काम अगाडि बढिरहँदा हामी प्रतीक्षालयमा आरामसँग बस्न पाउँछौँ,” उहाँले भन्नुभयो।

यस्तै, नागरिकताको प्रतिलिपि बनाउन प्रशासन कार्यालय पुगेकी दशरथचन्द नगरपालिका–३ दुर्गाभवानीकी कमला भाटले विगतको तुलनामा सेवा प्रवाह छिटो र सहज भएको बताउनुभयो। उहाँले यस्तै व्यवस्था अन्य सरकारी कार्यालयमा पनि लागू भए सेवाग्राहीलाई ठुलो राहत हुने धारणा राख्नुभयो।

सुर्नया गाउँपालिका–२ का पूर्णबहादुर चन्दले पनि टाढाबाट आउने सेवाग्राहीले पहिले निकै सास्ती खेप्नुपरेको स्मरण गर्दै अहिले भने कार्यालय प्रवेश गरेपछि काम सकिएर मात्रै बाहिर निस्कने वातावरण बनेको बताउनुभयो।

“पहिले एउटा कामका लागि दिनभर सदरमुकाममै बस्नुपर्ने अवस्था आउँथ्यो, अहिले समय पनि बचेको छ र हैरानी पनि कम भएको छ,” उहाँले भन्नुभयो।

कार्यालयले परिसरको सरसफाइ सुनिश्चित गर्ने, बिचौलियाको प्रवेशमा निगरानी बढाउने, पदअनुसारको कार्यविवरण कार्यान्वयन गर्ने तथा कार्यालयको वेबसाइट नियमित अद्यावधिक गर्ने जनाएको छ। वेबसाइटमा प्रमुख जिल्ला अधिकारीसहित सबै कर्मचारीको जिम्मेवारी र सम्पर्क विवरण राखिने तथा कार्यालयका उपलब्धि र सेवा प्रगतिको विवरण सूचना पाटीमार्फत सार्वजनिक गरिने प्रमुख जिल्ला अधिकारी भट्टराईले जानकारी दिनुभयो।

गृहमन्त्रालयले गत चैत १३ गते जिल्ला प्रशासन कार्यालयबाट प्रदान गरिने सेवालाई एकद्वार प्रणालीमार्फत सञ्चालन गर्न निर्देशन दिएको थियो। मन्त्रिपरिषद्बाट स्वीकृत ‘शासकीय सुधारका १०० कार्यसूची’ मा समेत सार्वजनिक सेवाप्रति नागरिकको विश्वास अभिवृद्धि गर्ने गरी काम गर्नुपर्ने व्यवस्था गरिएको छ।