विश्वकप लिग टूमा क्यानडाको लागतार तेस्रो जित, शीर्ष स्थानमा उक्लियो 

काठमाडौं । दुबईमा जारी आइसीसी विश्वकप लिग टू क्रिकेटमा क्यानडाले आफ्नो पहिलो सिरिजमा लगातार तेस्रो जित निकालेको छ । युएई र स्कटल्याण्डसँग खेल्नका लागि क्यानडाको टोली नेपालमा अभ्यास गरेर गएको थियो । दुबईमा अहिलेसम्म क्यानडाले युएईलाई दुवै तथा स्कटल्याण्डलाई एक खेलमा पराजित गरिसकेको छ । अब सिरिजको अन्तिम खेलमा स्कटल्याण्डसँग खेल्ने छ । दुवईमा आज भएको खेलमा क्यानडाले युएईलाई डिएल मेथड अनुसार ८ रनले पराजित गरेको हो । पहिला ब्याटिङ गरेको क्यानडाले निर्धारित ओभरको २ बल बाँकी हुँदा बर्षाका कारण ६ विकेट गुमाएर २४१ रन बनाएको थियो । त्यसपछि युएईले नयाँ लक्ष्य अनुसार ४६ ओभरमा २३७ रन पायो ।

अन्त्यमा निर्धारित ४६ ओभरमा युएईले ८ विकेट गुमाएर २२८ रनमात्रै बनाउन सक्यो ।