भोगाधिकार जग्गामा सशस्त्रका गणपतिहरुको मनपरी, ठाडामगरले किन दिए हाई टेन्सन लाइनको अनुमति ?

झापा । सशस्त्र प्रहरी बलको झापास्थित तत्कालीन पाथीभरा गणले आफूले भोगाधिकार लिएको पाडाजुलीस्थित जग्गा सुकुमबासीलाई भोगचलन गर्न दिएर झन्डै १५ वर्षसम्म रकम असुल्दै आएको खुलेको छ । सुकुमबासीलाई उनीहरू बस्दै आएको जग्गामा स्थायी रूपमा बस्ने वातावरण मिलाउने आश्वासन दिँदै बिघाको वार्षिक १० देखि १५ हजार रुपैयाँका दरले ५२ घर परिवारबाट रकम असुलेको खुलासा भएको हो । असुल गरिएको रकमको कुनै हिसाब राखिएको छैन । असुल गरिएको रकम तत्कालीन गणपतिहरूले लिने गरेको पाइएको छ ।

सुकुमबासीको बसोबास रहेको जग्गालाई गोपी पोखरेलले आफ्नो भएको दाबी गर्न थालेपछि सुकुमबासी परिवारले यो रहस्य खोलेका हुन् । यद्यपि पछिल्ला दिनमा भने सशस्त्र प्रहरीका अधिकारीले आफू फस्न सक्ने भन्दै सुकुमबासी परिवारबाट रकम नलिएको कागजात जबर्जस्त बनाउन लगाएको पनि खुलेको छ । पाथीभरा गण बस्दै आएको सो ठाउँमा अहिले जवान तालिम शिक्षालय र ३८ नम्बर गण रहेका छन् ।