राजनीतिको अन्तर्य सत्ता

यतिबेला सत्ताको राजनीति हावी भएको छ । जसरी पनि सत्तामा जानैपर्छ भन्ने सोचले राजनीतिक दल ग्रस्त छन् । नीतिमध्ये सबैभन्दा ठूूलो नीति राजनीति मानिन्छ । राजनीति ठीक ढंगले चल्यो भने अन्य नीति आफैं व्यवस्थित हुन्छन् भनिन्छ । तर, हामीकहाँ राजनीति लयमा कहिल्यै आउन सकेन । राजनीतिको अन्तिम ध्येय सत्ताप्राप्ति मात्र देखिँदै आएको छ । सत्तामा कसरी जाने र कसरी टिक्ने भन्ने उपायकै लागि राजनीति अँगालिएको पाइन्छ ।

गएको संसद्को चुनावकै संघारमा तत्कालीन प्रधानमन्त्री तथा नेपाली कांग्रेसका केन्द्रीय सभापति शेरबहादुर देउवालाई पत्रकारले सोधेका थिए, ‘यो निर्वाचनमा सागर ढकालजस्तो युवाले तपाईंलाई चुनौती दिँदै छन् । तपार्इंले नै जित्नुपर्छ भन्ने के छ ?’ प्रत्युत्तरमा देउवाको जवाफ थियो ‘अरूले जिते भने माननीय मात्र हुने हो, मैले जिते प्रधानमन्त्री हुने हो नि ।’ अझ देउवापत्नी डा. आरजु राणाले त डडेल्धुराजस्तो क्षेत्रमा हामीले जित्यौं भने हेलिकोप्टरमा आउन सक्छौं अरूहरू आउँछन् ? भन्दै शक्ति र सत्ताको ध्वाँस लगाएकी थिइन् ।