ढिलो न्याय अन्याय

बुधबार काठमाडौँ जिल्ला अदालतको पाँचौँ तलामा रहेको आठ नम्बर इजलासमा बहुचर्चित नक्कली भुटानी शरणार्थी प्रकरणको मुद्दामा बहस हुँदै थियो। इजलासबाहिर सुरक्षाकर्मीहरू र मुद्दाका पक्ष-विपक्षका मानिसहरू थिए भने इजलासभित्र पूर्वउपप्रधानमन्त्री टोपबहादुर रायमाझी, पूर्वगृहसचिव टेकनारायण पाण्डेसहित नौ जना थुनुवा र तिनका आफन्त बहस सुनिरहेका थिए।

इजलासमा न्यायाधीश तेजबहादुर खड्का बेलाबेला फाइल पल्टाएर हेर्दै थिए। इजलासअगाडिको पोडियममा अधिवक्ता राजकुमार सुवालले मुद्दाका आरोपित भुटानी शरणार्थी नेता टेकनाथ रिजालका तर्फबाट बहस गरिरहेका थिए।