स्थानीयले तोके कसमसको चुनढुंगा बोक्ने टिप्पर चलाउने समय

कसमस सिमेन्ट उद्योगका लागि उदयपुरगढी गाउँपालिकास्थित खानीबाट ढुवानी गरिने चुनढुंगा बोक्ने टिप्परहरू चल्ने समय स्थानीयवासीले निर्धारण गरेका छन्। आइतबार नेपालटारमा गाउँलेहरूको सहभागितामा बसेको टोल विकास संस्थाको बृहत् भेलाले बालबालिकालाई विद्यालय, बिरामीलाई स्वास्थ्यचौकी तथा स्थानीयवासी सर्वसाधारणलाई वडा कार्यालय जाने/आउने समय र राति टिप्पर चलाउन रोक लगाउने निर्णय गरेको हो।

बालबालिका स्कुल जान/आउन, सर्वसाधारण वडा कार्यालय र स्वास्थ्य चौकी जाने आउने समयमा टिप्पर चल्दा दुर्घटनाको उच्च जोखिम हुने गरेको भन्दै स्थानीयले टिप्पर सञ्चालनको समय निर्धारण गरेका हुन्। भेलाको निर्णयानुसार स्कुल, वडा कार्यालय र स्वास्थ्य चौकी जाने/आउने समय बिहान ९ देखि १० बजेसम्म टिप्पर नचलाउन तथा दिउँसो ३:३० देखि ४:३० बजेसम्म पनि टिप्पर चल्न नदिने निर्णय भएको दुर्घटना न्यूनीकरण अभियन्ता रमा मगरले बताइन्।