सुदूरपश्चिम प्रदेश: बेरोजगार जनताको प्रश्न- चौकीदारी गरेका मुख्यमन्त्री खै?

भारतमा चौकीदारी गरे बापत हातमा पर्ने पैसाले प्रागराज जोशीको घर चलेको छ। बीस हजार मासिक तलबबाट पुग नपुग पाँच हजार रुपैयाँ मात्र आफू खर्च गर्छन्। बाँकी कैलालीको भजनी नगरपालिका वडा नं ४ स्थित घरमा रहेकी श्रीमतीको नाममा पठाउँछन्।

त्यही पैसाले घरको चुल्हो बल्छ। केही समय अघिसम्म त छोराछोरीलाई पढाउन समेत पुग्थ्यो। अहिले महँगी बढेको छ। छोराछोरीको पढाइको खर्च पनि बढेको छ। त्यसैले पत्रकारितामा स्नातक तह गरिरहेकी छोरी र सिभिल इन्जिनियरिङ गरिरहेको छोरालाई पढाउन चौकीदार बुवाको तलबले पुग्दैन। छोराछोरी कक्षा चढेसँगै जोशीको ऋण पनि चढ्दै गएको छ।