अपेक्षा र चुनौतीका चाङबिच चलचित्र विकास बोर्डको नेतृत्वमा मनिष पण्डित

काठमाडौँ । बाहिर जतिसुकै ठुला बहस र नारा लगाइए पनि नेपाली चलचित्र क्षेत्रमा दशकौँदेखि आधारभूत संरचनात्मक सुधार हुन सकेको छैन । हरेक पटक चलचित्र विकास बोर्डको नेतृत्व फेरिँदा आशा जाग्ने र दुई वर्षको कार्यकाल सकिँदा निराशामा परिणत हुने पुरानै नियति छ ।

यस पटकको नेतृत्व परिवर्तनलाई भने चलचित्रकर्मीहरूले विशेष चासोका साथ हेरेका छन् । मुलुकमा नयाँ सोच, ऊर्जा र भिजनसहितको नेतृत्व आउनुपर्छ भन्ने जनआकांक्षा बढिरहेका बेला बोर्डले नयाँ नेतृत्व पाएको छ । गत असोज ३० गतेको मन्त्रिपरिषद् बैठकले युवा चलचित्रकर्मी मनिष पण्डितलाई बोर्डको अध्यक्षमा नियुक्त गरेको हो ।