भदौ २४ को घटना साम्राज्यवादी शक्तिले रचेको प्रपञ्च : प्रचण्ड

नेपाल कम्युनिष्ट पार्टी (नेकपा) का संयोजक पुष्पकमल दाहालले भदौ २४ गते भएको घटनालाई साम्राज्यवादी शक्तिहरूले रचेको योजनाबद्ध प्रपञ्च भएको दाबी गरेका छन् ।

बुधबार पोखरामा आयोजित नेकपा गण्डकी प्रदेश एकता बैठक तथा प्रशिक्षण कार्यक्रमलाई सम्बोधन गर्दै दाहालले उक्त घटनालाई प्रतिगमनको निरन्तरता र कम्युनिष्ट शक्तिलाई कमजोर पार्ने सुनियोजित प्रयासको संज्ञा दिएका हुन् । दाहालले तत्कालीन आन्दोलनका क्रममा देशलाई अस्थिरता र द्वन्द्वतर्फ धकेल्ने प्रयास भएको उल्लेख गर्दै विदेशी शक्तिहरूले नेपाली राजनीतिक परिवर्तनलाई प्रभावित पार्न खोजेको आरोप लगाए ।