गणेश कार्कीको प्रश्न– सदनमा अर्को गणेश नेपाली बन्नबाट रोक्ने छलफल खोइ ?

काठमाडौँ । राष्ट्रिय स्वतन्त्र पार्टी (रास्वपा) सांसद गणेश कार्कीले राहदानी विभाग अगाडि आत्मदाह गर्ने गणेश नेपालीको मृत्युको घटनालाई केवल ‘शोकको औपचारिकता’ मा मात्र सीमित नगर्न संसद्को ध्यानाकर्षण गराएका छन् । शुक्रबारको प्रतिनिधिसभा बैठकमा सांसद कार्कीले सदनमा धेरै सदस्यहरूले नाम समेत स्पष्ट नभई श्रद्धाञ्जली दिइरहेको भन्दै यसलाई ओठे भक्ति मात्र नबनाउन आग्रह गरे ।

सांसद कार्कीले गणेश नेपालीको घटनालाई थप दुखान्त र भावनात्मक बनाउने होडबाजी चलिरहेको बताउँदै भने, ‘१० हजार जरिवानाका कारण आत्मदाह गरेको भन्ने कुरा भ्रम हो कि सत्य, त्यसको खोजी हुनुपर्छ । हामीले भावनात्मक तर्क गरेर मात्र हुँदैन, मान्छेको जीवनभन्दा ठुलो तर्क अर्को केही हुन सक्दैन ।’