सम्पदा संरक्षण र समुदायसँग सहकार्यबारे भक्तपुरबाट सिक्नुपर्नेमा दक्षिणकाली नगर प्रतिनिधिको जोड

भक्तपुर। दक्षिणकाली नगरपालिकाका उपप्रमुख वसन्ती तामाङ (डंगोल)को नेतृत्वमा आएको एक टोलीले भक्तपुर नगरपालिकाका प्रमुख सुनिल प्रजापतिसँग भेटघाट गरी सम्पदा अवलोकन गरेको छ।

शुक्रबार राष्ट्रिय कला संग्रहालयको स्थलगत अवलोकनका लागि भक्तपुर पुगेको टोलीले भक्तपुर नगर प्रमुखसँग भेटी भक्तपुरको सम्पदा संरक्षण तथा शिक्षा, स्वास्थ्य तथा विकास निर्माणमा समुदायसँगको सहकार्यबारे अन्य नगरपालिकाले पनि सिक्नुपर्ने दक्षिणकाली नगर उपप्रमुखले बताएकी छिन्। उनले एक वर्षअघि भक्तपुर नगरपालिकाद्वारा सञ्चालित कलेजहरूको निरीक्षणका क्रममा भक्तपुरको अध्ययन अवलोकन गरेको स्मरण गर्दै यहाँबाट धेरै कुरा सिक्ने अवसर प्राप्त भएको बताएकी हुन्।