पश्चिम एसियामा युद्ध : नेपाली श्रमिकको सुरक्षा पूर्वतयारी खोइ ?

पश्चिम एसियामा बढ्दो युद्धको जोखिमले त्यहाँ कार्यरत लाखौँ नेपाली श्रमिक र तिनका परिवारलाई चिन्तित बनाएको छ । रोजगारी, परिवारको भविष्य र आर्थिक सुरक्षाको सपना बोकेर परदेशिएका नेपालीहरू अहिले फेरि अनिश्चितताको चपेटामा पर्ने जोखिम बढेको छ । हिजो कोभिड–१९ महामारीले रोजगारी खोस्दा लाखौँ श्रमिक प्रभावित भएका थिए । आज युद्धको सम्भावनाले रोजगारी गुम्ने जोखिम मात्र बढाएको छैन, कतिपय क्षेत्रमा मानवीय क्षति र ज्यानकै असुरक्षाको प्रश्नसमेत गम्भीर बनेको छ ।

साउदी अरबमा यमनका हुथी विद्रोहीले गरेका पछिल्ला आक्रमणले यो जोखिमलाई अझ सघन बनाएको छ । रियादस्थित किङ खालिद अन्तर्राष्ट्रिय विमानस्थललाई लक्षित गरी भएका आक्रमणमा मानिसहरूको ज्यान गएको, सयौँ घाइते भएको र हवाई सेवा प्रभावित भएको विवरण सार्वजनिक भएका छन् । साउदी अरबका विभिन्न क्षेत्रमा क्षेप्यास्त्र तथा ड्रोन आक्रमणको जोखिमसमेत देखिएको छ । यी घटनाले मध्यपूर्वमा कार्यरत नेपाली श्रमिकका लागि सुरक्षा चिन्ता थप गहिरो बनाएका छन् ।