ग्लोबल आइएमई बैंकले रच्यो ह्याट्रिक, लगातार तेस्रो वर्ष ‘बेस्ट बैंक अवार्ड’ बाट सम्मानित

काठमाडौं- ग्लोबल आइएमई बैंक लिमिटेडले प्रतिष्ठित अन्तर्राष्ट्रिय वित्तीय पत्रिका ‘ग्लोबल फाइनान्स’ द्वारा प्रदान गरिने ‘बेस्ट बैंक अवार्ड २०२६’ प्राप्त गरेको छ । यससँगै बैंकले लगातार तेस्रो वर्ष उक्त अन्तर्राष्ट्रिय सम्मान हासिल गरेको हो ।

बैंकले यसअघि सन् २०२४ र २०२५ मा पनि सोही विधामा ‘बेस्ट बैंक अवार्ड’ प्राप्त गरेको थियो । लगातार तीन वर्षसम्म यो सम्मान प्राप्त गर्नुलाई बैंकले आफ्नो वित्तीय क्षमता, सेवा विस्तार र संस्थागत उपलब्धिको महत्त्वपूर्ण मान्यता मानेको छ । थाइल्यान्डको राजधानी बैंककमा आयोजित विशेष समारोहमा ग्लोबल फाइनान्सका प्रतिनिधिले बैंकका नायब प्रमुख कार्यकारी अधिकृतद्वय सुमन पोखरेल र दीपचन्द्र रेग्मीलाई उक्त अवार्ड हस्तान्तरण गरेका हुन् ।