संसद्‌मा विपक्षीले प्रश्न गरे, गृहमन्त्रीले प्रतिप्रश्न

२६ असार, काठमाडौं । मुगुका २५ बर्षीय गणेश नेपालीले काठमाडौंमा गरेको आत्मदाहको विषयले शुक्रबारको संसद् बैठक स्तब्ध भयो । जति सांसदले बोले सबैजसोले श्रद्धाञ्जली व्यक्त गरे । नेपाली कांग्रेसका सांसद चन्द्रमोहन यादवले त एक मिनेट मौनधारण नै गरे ।

तर नेपालीको आत्महत्याको विषयलाई हेर्ने नजर सांसदहरूका फरक–फरक थिए । विपक्षी दलका सांसदहरूले गणेश नेपालीको दैनिकी, युवापन र गरिबीसँग जोडेर सरकारलाई प्रश्न गरे । सत्तापक्षले मानसिक स्वास्थ्यको विषय उठाए ।