मधेसमा नयाँ सरकार गठनको कसरत तीव्र, एमाले–जसपा–जनमतबिच छलफल

जनकपुरधाम । मधेस प्रदेश सरकारबाट बाहिरिएको नेकपा एमालेले नयाँ सरकार गठनका लागि जनता समाजवादी पार्टी नेपाल (जसपा) र जनमत पार्टीसँगको छलफललाई तीव्रता दिएको छ । तीनै दलबिच नयाँ गठबन्धन बनाएर सरकार गठन गर्ने विषयमा सकारात्मक छलफल भइरहेको नेताहरूले बताएका छन् ।

वर्तमान सरकारले विगतमा भएका सहमति कार्यान्वयन नगरेको र जनताले पनि सरकारको कामको अनुभूति गर्न नसकेको भन्दै एमालेले समर्थन फिर्ता लिएको मधेस प्रदेश संसदीय दलका नेता सरोजकुमार यादवले बताए । अब अन्य दलसँग मिलेर नयाँ सरकार गठन गर्ने प्रयासमा जुटेको उनको भनाइ छ ।