‘एक महिनाभित्र सडक खाल्डाखुल्डीमुक्त हुनुपर्छ’

काठमाडौं उपत्यकाका सडक खाल्डाखुल्डीमुक्त बनाउन उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले विशेष पहल थालेका छन् । मन्त्री श्रेष्ठले बुधबार मन्त्रालयका सचिव गोपालप्रसाद सिग्देलसहित सरोकारवाला पक्षसँग छलफल गर्दै एक महिनाभित्र सबै सडक खाल्डाखुल्डीमुक्त हुनुपर्ने बताएका छन् ।

सो अवसरमा उनले सडक विभागका महानिर्देशक अर्जुनजङ्ग थापा, उपत्यकाका तीन वटै सडक डिभिजनका प्रमुख, काठमाडौं महानगरपालिकाका मेयर बालेन्द्र शाह (बालेन), ललितपुर महानगरपालिकाका मेयर चिरिबाबु महर्जन, काठमाडौं उपत्यका विकास प्राधिकरणका आयुक्त जानुका ढकाल, अधिकारसम्पन्न बागमती सभ्यता एकीकृत विकास समितिका अध्यक्ष उद्धवप्रसाद तिमल्सिनालगायतका सरोकारवालासँग छलफल गरेका हुन् ।