बिहीबारसम्म राखेपको निर्णय पूर्ण रूपमा खारेज नभए एन्फालाई प्रतिबन्ध लगाउने

काठमाडौँ । विश्व फुटबलको सर्वोच्च निकाय (फिफा) ले अखिल नेपाल फुटबल संघ (एन्फा) र राष्ट्रिय खेलकुद परिषद् (राखेप) बिचको विवादलाई लिएर नेपाललाई कडा चेतावनी दिएको छ । राखेपले गत चैतमा गरेको विवादास्पद निर्णय पूर्ण रूपमा खारेज नगरे र स्वायत्तताको ग्यारेन्टी नगरे नेपाललाई अन्तर्राष्ट्रिय फुटबलबाट तुरुन्तै निलम्बन गर्ने चेतावनी फिफाले दिएको हो ।

फिफाले गत जुन ५ तारिखमा एन्फाका महासचिवलाई सम्बोधन गर्दै पठाएको पछिल्लो पत्रमा राखेपले चालेका कदमहरूलाई गम्भीरताका साथ उठाइएको छ । यसअघि राखेपले राष्ट्रिय खेलकुद विकास ऐन, २०७७ को दफा २९(३) बमोजिम एन्फामाथि लगाएको निलम्बन फुकुवा गरेको पत्र मे १५ मा फिफा र एसियाली फुटबल महासंघ (एएफसी) लाई पठाएको थियो । सोही पत्रमा राखेपले खेलकुद मन्त्रालय, फिफा, एएफसी र एन्फाबीच चाँडै संयुक्त भौतिक बैठक राखेर समस्या समाधान गर्न उत्सुक रहेको बताएको थियो ।