गणेश नेपालीको दर्दनाक अन्त्य: सडकदेखि सदनसम्म विरोध

काठमाडौंको त्रिपुरेश्वरस्थित राहदानी विभागअगाडि बिहीबार आत्मदाह प्रयास गरेका २५ वर्षीय युवक गणेश नेपालीको शुक्रबार मृत्यु भएको छ। उपचारका क्रममा वीर अस्पतालमा शुक्रबार बिहान सवा ११ बजेतिर उनको मृत्यु भएको हो। मुगुको सोरु गाउँपालिका–१ का नेपालीले बिहीबार दिउँसो पौने २ बजेतिर आत्मदाहको प्रयास गरेका थिए।

पठाओ गरेर जीविका चलाउँदै आएका नेपालीको मोटरसाइकलमा काठमाडौं महानगरपालिकाका प्रहरीले ‘ह्विल लक’ गरिदिएका थिए। त्यसपछि ती नगर प्रहरीसँग उनको विवाद भएको थियो। विवाद अलि मत्थर भएपछि नेपालीले आफ्नो मोटरसाइकल छुटाउन माफी मागेको थिए। प्रहरीले माफी दिन अस्वीकार गरेपछि उनले आत्मदाह गरेको प्रत्यक्षदर्शीहरूले बताएका छन्। पेट्रोल छर्केर आगो लगाएपछि नेपाली करिब चार मिनेट जलिरहे। कसैले पनि समयमै उनको शरीरको आगो निभाउन सकेनन्। अन्ततः अस्पताल भर्ना भएको २१ घण्टापछि शुक्रबार नेपालीको मृत्यु भएको वीर अस्पतालका बर्न प्लास्टिक विभागले जनाएको छ।