निजी क्षेत्रको मनोबल हालसम्मकै कमजोर : महासंघ अध्यक्ष श्रेष्ठ

निरन्तरको बजार सुस्ती, घट्दो माग र बढ्दो व्यावसायिक अनिश्चितताका कारण नेपाली निजी क्षेत्र गम्भीर दबाबमा परेको छ। नेपाल उद्योग वाणिज्य महासंघ (एफएनसीसीआई) का अध्यक्ष अन्जन श्रेष्ठले आफ्नो करिब ३६ वर्ष लामो व्यावसायिक यात्रामा व्यवसायीको मनोबल अहिलेको जस्तो कमजोर कहिल्यै नदेखेको बताएका छन्।

मंगलबार काठमाडौँमा आयोजित ‘नाडा अटो शो’को उद्घाटन समारोहमा बोल्दै अध्यक्ष श्रेष्ठले मुलुकको अर्थतन्त्र चुनौतीपूर्ण अवस्थाबाट गुज्रिरहेको बताए। आर्थिक गतिविधि संकुचित हुनु, बजारमा माग घट्नु र व्यवसाय सञ्चालनमा विभिन्न समस्या थपिँदै जानुले निजी क्षेत्रको मनोबल कमजोर बनेको उनको भनाइ थियो।