श्रमदानबाटै मध्यपहाडी लोकमार्गको १० किलोमिटर सडक मर्मत

खोटाङको साकेला गाउँपालिका भित्र पर्ने मध्यपहाडी लोकमार्गअन्तर्गतको सडक मर्मतमा स्थानीयवासी श्रमदानसहित जुटेका छन्। वर्षायाम नजिकिँदै जाँदा सडक थप जोखिमपूर्ण बन्न सक्ने अवस्था देखिएपछि जनप्रतिनिधिदेखि सर्वसाधारणसम्म सामूहिक रूपमा सडक सुधार अभियानमा सहभागी भएका हुन्।

शनिबारदेखि सुरु गरिएको मर्मत अभियान साकेला गाउँपालिका–१ को सेखुवादेखि चखेवाभञ्ज्याङसम्मको करिब १० किलोमिटर सडकखण्डमा केन्द्रित छ। केही दिनसम्म निरन्तर सञ्चालन हुने अभियानमा गाउँपालिका अध्यक्ष रविप्रकाश राईले स्वयं नेतृत्व गरेर खटिएका छन्।