संसदमा आक्रोशको कर्मकाण्ड: आरोप-प्रत्यारोपको चस्माभित्र हराउँदै गणेश नेपालीहरू

पठाओ चालक २५ वर्षीय गणेश नेपालीको आत्मदाहपछि शुक्रबार मृत्यु भएको छ। सोही विषयले शुक्रबार सडकदेखि सदनसम्म तात्यो; जुन अस्वाभाविक होइन। त्रिपुरेश्वरस्थित राहदानी विभागअगाडि बिहीबार दिउँसो भएको घटनापछि शुक्रबार बसेको प्रतिनिधिसभा बैठकमा आक्रोश, आँसु र राजीनामाको मागसहित ‘मुर्दावाद’ का नारा गुन्जिए, तर संसद्को यो दृश्य नेपाली राजनीतिका लागि नयाँ भने होइन।

विगतमा इलामका प्रेमप्रसाद आचार्यले संघीय संसद् भवनअगाडि आत्मदाह गर्दा होस् वा अन्य नागरिकले राज्यको व्यवहारबाट आजित भई देह त्याग गर्दा होस्, बलात्कारबाट मृत्यु हुँदा होस् वा बाढीले गाउँबस्ती बगाउँदा, भूकम्पले हल्लाउँदा होस् कि अन्य यस्ता घटनामा संसद् तात्छ। त्यति मात्र होइन एसइई परीक्षाको परिणाम आएपछि होस् वा अन्य कुनै घटनामा पनि संसद्मा सांसदहरू गरम सुनिन्छन्। सधैंँ यस्तै आक्रोश पोखिन्छ।