मेटाले घोषणा गर्‍यो ११५ मिलियन डलरको ‘अमेरिकाज् वर्कफोर्स एकेडेमी’

२७ जेठ, काठमाडौं । हजारौँ कर्मचारी कटौती गर्दै आर्टिफिसियल इन्टेलिजेन्सका टूलहरू प्रयोग गरिरहेको मेटाले बाह्य क्षेत्रमा भने रोजगारी सिर्जना गर्ने उद्देश्यले एक नयाँ परियोजना घोषणा गरेको छ। मेटाले रिजनल डेटा सेन्टरहरूको विकासमा गरिरहेको ठुलो लगानीलाई जनसम्पर्क (पब्लिक रिलेशंस) को अवसरका रूपमा उपयोग गर्दै ‘अमेरिकाज् वर्कफोर्स एकेडेमी’ नामक नयाँ आयोजना सुरु गरेको हो।

रोयटर्सका अनुसार, मेटाले यस परियोजनामा ११ करोड ५० लाख अमेरिकी डलर लगानी गर्दैछ। यस अन्तर्गत कम्पनीले विभिन्न निर्माण सम्बद्ध सङ्गठनहरूसँग साझेदारी गरी आफ्नो एआई पूर्वाधार निर्माण भइरहेका क्षेत्रका मानिसहरूलाई तालिम र रोजगारीको ग्यारेन्टीसहितको अवसर प्रदान गर्नेछ।