सुरक्षा चिन्ताबीच साउदी अरबमै हुने एसियन कप, जनवरी ७ मा उद्घाटन

काठमाडौं – साउदी अरबमाथि भइरहेका आक्रमण र मध्यपूर्वमा बढ्दो तनावका कारण प्रतियोगिताको आयोजनाबारे आशङ्का उत्पन्न भए पनि सन् २०२७ को एसियन कप निर्धारित तालिकाअनुसार साउदी अरबमै आयोजना हुने भएको छ।

एसियन फुटबल कन्फेडेरेसन (एएफसी) ले सोमबार सार्वजनिक गरेको तालिकाअनुसार प्रतियोगिता जनवरी ७ मा रियादबाट सुरु हुनेछ । उद्घाटन खेलमा समूह ‘ए’ अन्तर्गत आयोजक साउदी अरबले प्यालेस्टाइनसँग प्रतिस्पर्धा गर्नेछ । रियादस्थित ७२ हजार दर्शक क्षमताको किङ फहद स्पोर्ट्स सिटी स्टेडियममा उद्घाटन खेल हुनेछ। फेब्रुअरी ५ मा हुने फाइनल पनि यही मैदानमा आयोजना गरिनेछ ।