त्रिभुवन विमानस्थलमा निर्माण आयोजनाको लापरबाहीले उडान सुरक्षामाथि खतरा

काठमाडौँ । त्रिभुवन अन्तर्राष्ट्रिय विमानस्थलमा सञ्चालन भइरहेको निर्माण आयोजनाको लापरबाहीका कारण उडान सुरक्षामाथि गम्भीर प्रश्न उठ्न थालेको छ। रनवे तथा अन्य संवेदनशील क्षेत्रमा निर्माण आयोजनाका सवारीसाधन अनधिकृत रूपमा प्रवेश गर्ने घटना पटक–पटक दोहोरिँदा पनि सम्बन्धित निकायले प्रभावकारी नियन्त्रण गर्न नसकेको आरोप विमानस्थलभित्रैबाट उठेको छ।

हाल विमानस्थलमा समानान्तर ट्याक्सीवे लगायतका पूर्वाधार निर्माण कार्य जारी छ। असार १५ गते बिहान ६ : १२ बजे जजिरा एयरवेजको उडान नम्बर १५३९ काठमाडौँ अवतरणका लागि करिब एक माइलको दूरीमा पुगेको बेला धावनमार्गको बीच भागबाट एउटा टिपरले रनवे क्रस गरेको थियो ।