गुवाहाटीको होटलमा गो*ली चल्दा पाँच जनाको मृ*त्यु, एक घाइते

भारतको असमस्थित गुवाहाटीमा सोमबार राति एक होटलमा एक व्यक्तिले गोली चलाउँदा पाँच जनाको मृत्यु भएको छ भने एक जना घाइते भएका छन्। मृत्यु हुनेमध्ये एउटै परिवारका चार जना रहेका छन्। उनीहरूमा होटल सञ्चालककी पत्नी र छोरा पनि छन्।

घटना बोरा सर्भिस क्षेत्रमा रहेको बिलास इन होटलमा भएको हो। प्रहरी आयुक्त पार्थ सारथी महन्तका अनुसार होटलको लिज सम्झौतासँग सम्बन्धित सम्पत्ति विवादका कारण गोलीकाण्ड भएको हो। आरोपित घनकान्त गोगोईले गत वर्ष उक्त होटल लिज (भाडा) मा लिएका थिए। पछिल्लो समय लिज सम्झौताको विषयलाई लिएर उनको होटल मालिकको परिवारसँग विवाद चलिरहेको थियो।