रुसी राष्ट्रपति पुटिन थप २ कार्यकाल नेतृत्वमा रहन सक्ने

एजेन्सी । रुसी राष्ट्रपति भ्लादिमिर पुटिनका लागि सन् २०३६ सम्म राष्ट्रपति बन्ने बाटो खुलेको छ । सोमबार राष्ट्रपति पुटिनले एउटा कानुनलाई अन्तिम अनुमति दिएसँगै उनको कार्यकाल सन् २०३६ सम्म लम्बिने बाटो खुलेको हो । सो कानुनले पुटिनलाई राष्ट्रपति पदमा अरु दुई कार्यकालका लागि रहन अनुमति दिएको अन्तर्राष्ट्रिय सञ्चारमाध्यामहरुले जनाएका छन् । रुसमा राष्ट्रपतिको एक कार्यकाल ६ वर्षको हुनेछ ।

सोमबार सो कानुन पारित गरिएसँगै पुटिनको राष्ट्रपतिको कार्यकाल १२ वर्ष थपिने भएको हो । पुटिनको कार्यकाल सन् २०२४ मा सकिँदै थियो । स्मरणरहोस्ः ६८ वर्षीय पुटिन दुई दशकभन्दा बढी समयदेखि रुसको सत्तामा रहेका छन् । रुसी सरकारको कानुनी सूचना पोर्टलमा जारी गरिएको सूचनाअनुसार पुटिनले सोमबार सो कानुनमा हस्ताक्षर गरेका छन् ।