रास्वपा कोसी प्रदेश सभापतिमा ७ दाबेदार, कसरी हुँदै छ अधिवेशन ?

काठमाडौं । राष्ट्रिय स्वतन्त्र पार्टी (रास्वपा) कोसी प्रदेशको अधिवेशन आजबाट सुरु भएको छ । प्रदेश सभापतिका लागि सातजनाले उमेदवारी दिएका छन् ।

चन्द्र राई, चन्द्रकुमार गौली, सरिन तामाङ, पिताम्बर तिम्सिना, पारशमणि गेलाल, नारायणप्रसाद घिमिरे र खगेन्द्र कटुवाल सभापतिका दाबेदार हुन् ।

कार्यतालिकाअनुसार, असार १ गतेसम्म सातवटै प्रदेशको अधिवेशन हुनेछ । तर, वाग्मती प्रदेशमा हिजो नै हुने भनिएको चुनावी प्रक्रिया अर्को सूचना जारी नभएसम्मका लागि स्थगित गरिएको छ ।

रास्वापाको विधानअनुसार, प्रदेशपिच्छे फरक–फरक समिति हुने व्यवस्था छ । कोसी प्रदेशमा ६१, मधेसमा ५९, वाग्मती प्रदेशमा ६५, गण्डकीमा ४७, लुम्बिनीमा ५७, कर्णालीमा ४१, सुदूरपश्चिममा ४३ सदस्यीय प्रदेश समिति रहने व्यवस्था रास्वपाको विधानमा छ ।

रास्वपा निर्वाचन आयोगका सचिव भूमिनन्द बरालका अनुसार, बन्दसत्र सुरु भइसकेको छ । “बन्दसत्र सुरु भइसकेको छ । अब निर्वाचन प्रक्रियामा अगाडि बढ्छ,” उनले भने ।

जेठ २७ गते कोसी, २८ गते मधेस, २९ गते गण्डकी, ३० गते लुम्बिनी र ३१ गते कर्णाली प्रदेशमा अधिवेशन आयोजना हुनेछ ।

सुदूरपश्चिम प्रदेशको अधिवेशन असार १ गते तय गरिएको छ । त्यसपछि असार ७, ८ र ९ गते पहिलो राष्ट्रिय महाधिवेशन चितवनमा हुनेछ ।

#राष्ट्रिय स्वतन्त्र पार्टी (रास्वपा)

#कोसी प्रदेश