नीतिदेखि पूर्वाधारसम्म, महावीर पुनको नेतृत्वमा नवप्रवर्तन मन्त्रालयले कोर्दै नयाँ रोडम्याप

काठमाडौं । नवगठित विज्ञान, प्रविधि तथा नवप्रवर्तन मन्त्रालयले आफ्नो कार्य प्रारम्भसँगै संस्थागत र नीतिगत आधार निर्माणको काम अघि बढाएको छ । सरकारले हालै गरेको कार्यविभाजनअनुसार शिक्षा, विज्ञान तथा प्रविधि मन्त्रालयबाट विज्ञान तथा प्रविधिसम्बन्धी जिम्मेवारी अलग गरी नवप्रवर्तन क्षेत्रलाई समेत समेटेर नयाँ मन्त्रालय स्थापना गरेको हो ।

मन्त्रालयको नेतृत्व स्वतन्त्र सांसद महावीर पुनले सम्हालेका छन् । उनले पदभार ग्रहण गरेलगत्तै मन्त्रालयको संगठन तथा व्यवस्थापन सर्वेक्षण (ओएनएम) प्रक्रिया अगाडि बढाउने निर्णय गरेका छन् । नयाँ मन्त्रालय भएकाले प्रशासनिक संरचना, जनशक्ति व्यवस्थापन र कार्य क्षेत्रको स्पष्ट खाका तयार गर्नुपर्ने अवस्था रहेको मन्त्रालयको भनाइ छ ।