काठमाडौँको मौलिक संस्कृति, परम्परालाई विश्वव्यापी रूपमा प्रवर्द्धन गर्छौँ : सुनिता डंगोल

काठमाडौं । काठमाडौँ महानगरपालिकाकी कार्यवाहक प्रमुख सुनिता डंगोलले काठमाडौँको मौलिक संस्कृति, परम्परालाई विश्वव्यापी रूपमा प्रवर्द्धन गरिने बताएकी छन् । ‘काठमाडौँ फिल्म फेस्टिभल २०८३’ को जानकारी दिन मंगलबार आयोजित कार्यक्रममा कार्यवाहक प्रमुख डंगोलले काठमाडौँको मौलिक संस्कृति, परम्परा, मूर्त–अमूर्त सम्पदा र अहिलेसम्म नभनिएका कथाहरूलाई विश्वव्यापी रूपमा प्रवर्द्धन गर्ने उद्देश्यसहित महोत्सव आयोजना गर्न लागिएको जानकारी दिइन् ।

काठमाडौँ युनेस्को रचनात्मक सहर सञ्जाल (चलचित्र विधा) को सदस्य नगरसमेत भएको बताएकी डंगोलले काठमाडौँ कथै कथाको सहरसमेत भएको बताइन् । यसैलाई सार्थक बनाउन महानगरले चलचित्रलाई समुदाय र शिक्षासँग जोडेर प्राज्ञिक एवं प्राविधिक उद्योगका रूपमा विकास गर्न खोजेको धारणा राखिन् ।