होल्डिङ सेन्टरमा प्रहरी हस्तक्षेपप्रति ‘जेनजी मुभमेन्ट एलाइन्स’ को घोर आपत्ति, दोषीमाथि कारबाही गर्न माग

काठमाडौँ । कीर्तिपुरस्थित होल्डिङ सेन्टरमा आश्रय लिइरहेका सुकुमबासी तथा विस्थापित नागरिकहरूको अवस्था बुझ्न र सहयोग गर्न पुगेका शान्तिपूर्ण नागरिक तथा युवाहरूमाथि प्रहरीले दमन, कुटपिट र मनपरी गिरफ्तारी गरेको भन्दै ‘जेनजी मुभमेन्ट एलाइन्स’ ले घोर आपत्ति जनाएको छ । एलाइन्सले शनिबार प्रेस विज्ञप्ति जारी गर्दै प्रहरीको उक्त कदम लोकतान्त्रिक मूल्यमान्यता, कानुनी शासन र मानवअधिकारमाथिको प्रत्यक्ष आक्रमण भएको दाबी गरेको छ ।

सरकारले पर्याप्त तयारी, वैकल्पिक आवास र मानवोचित व्यवस्थापन बिना नै गत वैशाख महिनादेखि जबर्जस्ती उठाएका सुकुमबासीहरूलाई कीर्तिपुर होल्डिङ सेन्टर लगायतका अस्थायी व्यवस्थापन स्थलहरूमा राखेको विज्ञप्तिमा उल्लेख छ । निरन्तरको वर्षाका कारण उक्त होल्डिङ सेन्टर डुबानमा परेपछि त्यहाँका विस्थापितहरूको अवस्था बुझ्न र आवश्यक सहयोग पुर्‍याउन पुगेका युवाहरूमाथि प्रहरीले अभद्र व्यवहार, गालीगलौज र कुटपिट गरेको एलाइन्सको आरोप छ । प्रहरीले कुनै स्पष्ट कानुनी आधार वा पक्राउ पुर्जी बिना नै जेन जी मुभमेन्ट एलाइन्सका प्रतिनिधि माजिद अन्सारी लगायतका व्यक्तिहरूलाई नियन्त्रणमा लिएको प्रति संस्थाले गम्भीर ध्यानाकर्षण भएको जनाएको छ ।