अमेरिकी कदमको निन्दा गर्दै घनश्याम भुसालले भने- प्रचुर खनिज तेल लूटको तयारी

नेपाल कम्युनिष्ट पार्टी (संयुक्त) का कार्यवाहक अध्यक्ष घनश्याम भुसालले भेनेजुएलामाथि अमेरिकाले गरेको आक्रमणको निन्दा गरेका छन्।

आइतबार प्रेस विज्ञप्ति जारी गर्दै कार्यवाहक अध्यक्ष भुसालले अमेरिकाले भेनेजुएलमाथि गरेको आक्रमणले ‘आधुनिक मानव सभ्यतालाई लज्जित तुल्याएको’ र यो आक्रमण भेनेजुएलाको सार्वभौमसत्ता र स्वतन्त्रतामाथि ठाडो हमला भएको बताएका छन्।

‘यो अन्तरराष्ट्रिय कानून र संयुक्त राष्ट्र सङ्घको वडापत्रको समेत उल्लङ्घन हो,’ भुसालले जारी गरेको विज्ञप्तिमा भनेका छन्।

शनिबार बिहान भेनेजुएलाको राजधानीस्थित राष्ट्रपति निकोलस मादुरो निवास नियन्त्रणमा लिएर मादुरो र उनकी पत्नीलाई अमेरिकी सेनाले पक्राउ गरेको थियो। उनीहरू यतिबेला अमेरिका पुर्याइएका छन्।

सोही घटनाको विरोध गर्दै भुसालले भनेका छन्, ‘अमेरिकाले एउटा स्वतन्त्र र सार्वभौम मुलुक भेनेजुएलामाथि भिषण आक्रमण गरेर त्यहाँका निर्वाचित राष्ट्रपति निकोलस मादुरोलाई अपहरण गर्दै न्युयोर्क पुऱ्याइएको समाचार सुन्दा हामी स्तब्ध भएका छौं।’

‘अमेरिकी साम्राज्यवाद विश्वशान्तिका लागि सधैं खतरा रहिआएको’ दाबी गर्दै उनले अगाडि भनेका छन्, ‘यस आक्रमणले त्यस तथ्यलाई अझ स्पष्ट पारेको छ। एकपछि अर्को मुलुकमाथि आक्रमण गर्नु आफ्ना कठपुतली खडा गर्नु र त्यहाँको साधन श्रोतमा लूट मच्चाउनु साम्राज्यवादको चरित्र हो।’

भेनेजुएलामाथि भएको आक्रमण त्यहाँको प्रचुर खनिज तेलको लूट र त्यस क्षेत्रका अन्य मुलुकमाथि हस्तक्षेपको तयारी भएको भुसालको भनाइ छ।

उनले आक्रमण तुरून्तै बन्द गर्न माग गर्दै त्यस आक्रमणको विरूद्ध एकताबद्ध हुन सम्पूर्ण अन्तरराष्ट्रिय समुदायलाई आह्वान पनि गरेका छन्। उनले ‘साम्राज्यवादको विरूद्ध भेनेजुएलाका जनताको प्रतिरोधमा ऐक्यबद्धता व्यक्त’ गरेका छन्।