जुलियन अल्भारेज अनुबन्ध गर्न बार्सिलोनाको दाउ, रोक्नका लागि एथलेटिको म्याड्रिडको कडा अडान

काठमाडौँ । बार्सिलोनाका अध्यक्ष जोआन लापोर्टाले एथलेटिको म्याड्रिडका स्ट्राइकर जुलियन अल्भारेजलाई अनुबन्ध गर्न क्लबले औपचारिक प्रस्ताव पठाएको पुष्टि गरेका छन् । अर्जेन्टिनाका विश्वकप विजेता अल्भारेज क्याम्प नोउ आउन इच्छुक रहे पनि म्याड्रिड क्लबको कठोर नीतिका कारण वार्ता अघि बढ्न नसकेको उनले खुलासा गरेका छन् ।

बार्सिलोनाका खेलकुद निर्देशक डेकोमार्फत पठाइएको यो प्रस्ताव क्लब स्तरमै औपचारिक रूपमा पठाइएको लापोर्टाले स्पष्ट पारेका छन् । यसअघि अर्जेन्टिनाले अस्ट्रियालाई २–० ले पराजित गरेपछि अल्भारेजले पनि आफ्नो सपना पूरा गर्नका लागि एथलेटिकोसँग कुरा गरिसकेको र स्थानान्तरण (ट्रान्सफर) नै सबैका लागि राम्रो विकल्प हुने मिडियासमक्ष बताएका थिए । लापोर्टाले खेलाडीको उक्त भनाइमा बार्सिलोनाको कुनै भूमिका नरहेको र अल्भारेज म्यानचेस्टर सिटी जानुअघि देखि नै बार्सिलोनाको नजरमा रहेको खुलासा गरेका छन् ।