कीर्तिपुर होल्डिङ सेन्टरमा अभियन्तामाथि दमन भएको आरोप, छानबिन र रिहाइको माग

नेपाल महिला एकता समाजले कीर्तिपुर होल्डिङ सेन्टरमा भूमिहीन सुकुम्बासीहरूको अवस्था बुझ्न पुगेका मानवअधिकारकर्मी तथा अभियन्तामाथि प्रहरीले कुटपिट, बल प्रयोग र पक्राउ गरेको भन्दै त्यसको भर्त्सना गरेको छ।

शनिबार जारी प्रेस विज्ञप्तिमा समाजले कीर्तिपुरस्थित अस्थायी होल्डिङ सेन्टरमा बाढी प्रभावित भूमिहीन सुकुम्बासीहरूको अवस्था बुझ्न, मानवीय सहायता तथा सहकार्यका लागि पुगेका अभियन्ता माजिद अन्सारी, सरिस्मा थापा र नेल्शन घतानीमाथि प्रहरीले गरेको व्यवहार लोकतान्त्रिक मूल्य, विधिको शासन र मानवअधिकारको सिद्धान्तविपरीत भएको जनाएको छ।