गाउँमा युवा छैनन्, भोजपुरका किसानलाई धान भित्र्याउनै सकस

काठमाडौं – गाउँघरबाट युवा जनशक्ति वैदेशिक रोजगारी र सहरतर्फ पलायन हुन थालेपछि भोजपुरका किसानलाई धान काट्न र थन्क्याउन समस्या हुन थालेको छ। वर्षभरि मेहनत गरेर फलाएको धान पाकेपछि भित्र्याउने समयमा कामदार नपाउँदा किसानलाई सास्ती भएको हो ।

धान खेतीका लागि रोपाइँदेखि गोडमेलसम्म मेहनत गरेका किसानले अहिले बाली भित्र्याउन जनशक्ति खोज्नुपर्ने अवस्था छ । गाउँमा युवा घट्दै गएपछि धान काट्ने, बिटा बाँध्ने, खेतबाट खलोमा पुर्‍याउने, झाँट्ने, बत्ताउने र घरसम्म ओसार्ने काम प्रभावित भएको छ। विशेषगरी शारीरिक श्रम बढी लाग्ने यी कामका लागि कामदार पाउन कठिन हुँदै गएको स्थानीय किसान बताउँछन् ।