बाढीले सरकारी भवन र अभिलेखमा क्षति, सेवा प्रवाह प्रभावित

काठमाडौं – गत असोज दोस्रो साताको बाढीपहिरोले म्याग्दीका सरकारी कार्यालयका भवन, महत्त्वपूर्ण कागजात र उपकरणमा क्षति पुर्‍याएपछि सेवा प्रवाह प्रभावित भएको छ। बाढीले कार्यालयका भुइँतलामा रहेका कोठा पुरिनुका साथै कम्प्युटर, फर्निचर, प्रिन्टर, अभिलेख र अन्य सामग्री नष्ट गरेपछि नियमित कामकाज सञ्चालन गर्न कठिन भएको हो ।

बेनी नगरपालिका–७ मा रहेका भेटेरिनरी अस्पताल तथा पशु सेवा विज्ञ केन्द्र, डिभिजन वन कार्यालय र बेनी नगरपालिकाको भवनमा असोज ११ गते बिहान बराहपाखोबाट आएको बाढी पसेर क्षति पुर्‍याएको थियो। बाढीले कार्यालयका भुइँतलाका कोठामा माटो र गेग्रान थुपारेपछि त्यहाँबाट दिइँदै आएको सेवा प्रभावित भएको हो ।