भोटेकोसी बाढीको दुई महिना: त्रिपालमै सकियो वर्षा, हिउँदको डर सुरु

रसुवामा गत भदौ १० गते आएको भीषण बाढीको दुई महिना पूरा भइसक्दा र मनसुनी वर्षासमेत थामिइसक्दा पनि हजारौं पीडित परिवारको बिचल्ली कायमै छ। भोटेकोसी र त्रिशूली नदीमा आएको विनाशकारी बाढीले घर, जग्गा र जीविकोपार्जनका माध्यम गुमाएका स्थानीय बासिन्दा दुई महिना बितिसक्दासमेत अझै पनि उचित राहत र पुनःस्थापनाको पर्खाइमा छन्। विस्थापित धेरै परिवार अझै होल्डिङ सेन्टर, गुम्बा र त्रिपालमुनि छन्। अब उनीहरूसामु हिउँद छ र राज्यका घोषणा र पीडितका हातमा पुगेको सहायताबिचको दूरी त्यही मौसमले जाँच्नेछ।

सरकारले प्रभावित परिवारलाई निश्चित मापदण्डका आधारमा ६ महिनासम्म मासिक घर भाडा सहायता दिने निर्णय गरेको छ। चार सदस्यसम्मको परिवारले मासिक १५ हजार रुपैयाँ पाउनेछ, त्यसभन्दा बढी सदस्य भए प्रतिव्यक्ति मासिक दुई हजार थपिनेछ। बाढीपहिरो तथा प्राकृतिक विपद्बाट प्रभावित घरपरिवारलाई अस्थायी आवास निर्माणका लागि सरकारले प्रतिपरिवार कुल ५० हजार रुपैयाँ अनुदान दिने निर्णय गरेको छ, तर यो रकम पाउनका लागि स्थानीय तहबाट ‘लाभग्राही प्रमाणीकरण’ (वास्तविक पीडितको पहिचान र सूचीकरण) हुन अनिवार्य छ तर लाभग्राही प्रमाणीकरण नसकिएकाले यो सहायता वितरणमा कठिनाइ भइरहेको छ। मृत घोषणा भएकाका परिवारलाई प्रति मृतक दुई लाख दिने तयारी पनि त्यही चरणमा अड्किएको छ। राष्ट्रिय विपत् जोखिम न्यूनीकरण तथा व्यवस्थापन प्राधिकरणका अधिकारीका अनुसार प्राधिकरणसँग आफ्नै कोषबाट रकम छ, तर पहिचान र प्रमाणीकरण नसकिएकाले खर्च हुन सकेको छैन।