तेह्रथुममा कोदो खेती घट्दै, बजारमा नयाँ परिकारको खोजी

१० कात्तिक, तेह्रथुम । कुनै समय तेह्रथुमका गाउँबस्तीमा असार, साउन र भदौको पहिलो सातासम्म कोदो रोप्ने चटारो हुन्थ्यो । किसानका खेतबारीमा खेतला र पर्म गर्नेहरूको चहलपहल देखिन्थ्यो ।

एक किसानको खेतमा कोदो रोप्न जम्मा भएका गाउँले अर्को दिन अर्काको खेतमा पुगेर काम सघाउँथे । त्यतिबेला किसानले दुईदेखि ७०–८० रोपनीसम्मको जमिनमा कोदो खेती गर्ने गर्थे । मकैसँगै कोदो लगाउने चलन थियो । उत्पादित कोदोबाट ढिँडो, रोटी र खोले बनाएर खाने र बिक्री गर्ने गरिन्थ्यो ।