आगाे र आन्दाेलनले उब्जाएकाे प्रश्न : नागरिक राज्यसँग किन यति निराश ?

काठमाडौँ । समाज र राज्यको असन्तुलनकारी व्यवहारका कारण नागरिकमा उकुसमुकुस बढेको छ। यही उकुसमुकुसको परिणाम स्वरुप मुगुका गणेश नेपाली र काठमाडौँस्थित बुद्धनगरका अश्विन राउतले अकल्पनीय बाटो रोजे ।

गणेश र अश्विनले आफ्नै शरीरमा आगो लगाएको घटनासँगै सुकुमबासी तथा अव्यवस्थित बसोबासीको समस्या पनि मुखरित भएको छ । शुक्रबार यता काठमाडौँको सडक आन्दोलित छ । सञ्चारमाध्यमदेखि सामाजिक सञ्जालसम्म आत्मदाह र सुकुमबासीसँग सम्बन्धित विषयले प्रशस्तै ठाउँ पाएको छ । यी दुवै घटनामा मानिसका आ–आफ्नै तर्क र विश्लेषण आइरहेका छन् । पक्ष–विपक्षमा आफ्ना मत प्रकट भइरहेका छन् ।