भक्तपुरको खरिपाटी होल्डिङ सेन्टरमा जे देखियो...

सुकुम्बासीको अस्थायी व्यवस्थापनका लागि भक्तपुरको खरिपाटीमा दुई वटा भव्य भवन छुट्याइएका छन्। ती दुवै भवनको मुख्य प्रवेशद्वारअगाडि पाँच–सात वटा मेच बस्नका लागि राखिएका छन्। प्रवेशद्वारबाट भित्र पस्नेबित्तिकै एउटा फोटोकपी पेपरमा लेखेर टाँसिएका छन्, विभिन्न कोठा तथा तल्लामा प्रयोग हुने इन्टरनेटका पासवर्ड।

भवनहरू जति भव्य छन्, भित्रका कोठाहरू पनि उति नै सफा, सुन्दर र व्यवस्थित छन्। मानौं ती होल्डिङ सेन्टरका नभई तारे होटलका कोठा हुन्। खाना–खाजाका लागि छुट्टै भवनमा टेबलमै बसेर खाने व्यवस्था गरिएको छ। नेपाल विद्युत् प्राधिकरणको तालिम केन्द्र रहेको कारण यो स्थान ठूलो क्षेत्रफलमा फैलिएको छ। फराकिलो खुला क्षेत्र (ओपन स्पेस) र चारैतिर फैलिएको हरियाली यस ठाउँको विशेष आकर्षण हो। ठूलो क्षेत्रफल, हरियो घाँसे मैदान र शान्त वातावरणका कारण यहाँ बसिरहेका सुकुम्बासीलाई दिन बिताउन खासै कठिनाइ देखिँदैन।