राजनीतिक भेटघाट गरेर फर्किए क्वात्रा

काठमाडौं । नेपालको दुई दिने भ्रमणमा आएका भारतीय विदेश सचिव विनयमोहन क्वात्राले नेपालको संसद्मा सहभागी सबै दलका शीर्ष नेताहरूलाई भेटेर स्वदेश फर्कनुभएको छ । उहाँको भ्रमणको मुख्य उद्देश्य दलहरूले सार्वजनिक गर्न चाहेका छैनन् । क्वात्राले दुई देशबीच परराष्ट्र सचिवस्तरीय बैठक गरेलगत्तै राष्ट्रपति विद्यादेवी भण्डारी, प्रधानमन्त्री पुष्पकमल दाहाल ‘प्रचण्ड’, उपप्रधान तथा ऊर्जा, जलस्रोत तथा सिँचाइमन्त्री राजेन्द्र लिङ्देन, भौतिक पूर्वाधार तथा यातायातमन्त्री नारायणकाजी श्रेष्ठ, विपक्षी दलका नेता कांग्रेस सभापति शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल, सत्ता साझेदार दलका नेताहरू केपी ओलीलगायत नेताहरूसँग भेट गर्नुभएको थियो । उहाँले मधेसी नेताहरू महन्थ ठाकुर, डा. सिके राउत समेतलाई भेटेर फर्किएको भारतीय दूतावासले जनाएको छ ।

नेताहरूको भेटमा अन्तरदेशीय सम्बन्ध र विकास परियोजनाका विषयमा छलफल भएको बताइएको छ । यद्यपि, पछिल्लो समसामयिक राजनीतिका बारेमा समेत सामान्य चासो राखेको भौतिक पूर्वाधार तथा यातायात मन्त्रालय स्रोतले बतायो ।