पर्यटन विभागले भन्यो- उच्च हिमाली भेगको यात्रा स्थगित गरौं

११ कात्तिक, काठमाडौं । पर्यटन विभागले ११ देखि १५ कात्तिकसम्म देशका विभिन्न स्थानमा भारी वर्षा तथा हिमाली क्षेत्रमा हिमपात र हिमपहिरोको जोखिम रहेको भन्दै उच्च हिमाली क्षेत्रमा नजान पर्यटक तथा पर्वतारोहीलाई आग्रह गरेको छ ।

नेपाल मौसम विज्ञान विभागको मौसम बुलेटिन अनुसार उक्त अवधिमा मेघगर्जन, चट्याङ र हावाहुरी सहित भारी वर्षा हुन सक्ने सम्भावना छ । वर्षाका कारण बाढी, पहिरो तथा भूक्षयको जोखिम बढ्नुका साथै हिमाली क्षेत्रमा हिमआँधी र हिमपहिरो जान सक्ने पूर्वानुमान गरिएको छ ।