सिङ्गा तातोपानीमा स्वास्थ्य पर्यटनको याम सुरु

म्याग्दीको बेनी नगरपालिका–४ स्थित प्राकृतिक उपचार स्थलका रुपमा परिचित सिङ्गा तातोपानी कुण्डमा स्नान गरेर स्वास्थ्य लाभ लिन आउने सर्वसाधारण तथा बिरामीको चहलपहल बढेसँगै स्वास्थ्य पर्यटनको याम सुरु भएको छ । कात्तिकदेखि वैशाख महिनासम्म तातोपानीको कुण्डमा स्नान गरेर स्वास्थ्य लाभ लिनका लागि आउने सर्वसाधारणहरुका कारण कुण्डमा भिडभाड हुन्छ ।

दसैँलगत्तै कुण्डमा स्नान गर्न आउनेको सङ्ख्या बढेको छ । प्राकृतिक रुपमा निस्कने तातोपानीका पोखरीमा स्नान गर्दा विभिन्न स्वास्थ्य समस्याबाट राहत मिल्ने विश्वासका साथ म्याग्दीसहित देशका विभिन्न जिल्लाबाट मानिसहरु यहाँ आउने गरेका छन् । अहिले दैनिक सात सयभन्दा बढीले कुण्डमा स्नान गर्ने गरेको कुण्ड व्यवस्थापन समितिका अध्यक्ष कृष्ण खड्काले जानकारी दिनुभयो ।