१७ लाख सवारी लाइसेन्स छाप्ने सम्झौताको म्याद सकिँदै, अहिलेसम्म कति छापिए ?

काठमाडौं । सवारी चालक अनुमतिपत्र (लाइसेन्स) छपाइका लागि यातायात व्यवस्था विभाग र सुरक्षण मुद्रण केन्द्रबिच भएको सम्झौताको समयसीमा सकिन लागेको छ । विभागले केन्द्रसँग पछिल्लो समय ३२ असारभित्र १७ लाख थान लाइसेन्स छाप्ने गरी सम्झौता गरेको थियो ।

पछिल्लो तथ्याङ्कअनुसार शनिबार (२७ असार) सम्म केन्द्रले कुल १३ लाख २८ हजार ८४१ वटा लाइसेन्स प्रिन्ट गरेको छ । जसमध्ये अत्यावश्यक प्रिन्ट ४ हजार ८८१, पुराना (ब्याकलग) १० लाख ९४ हजार ४२ र दैनिक प्रिन्ट अन्तर्गत २ लाख २९ हजार ९१८ वटा कार्ड छापिएका हुन् । तीमध्ये एकदेखि डेढ लाखसम्म प्याकिङ भएर यातायात व्यवस्था विभाग पठाउने तयारी भइरहेको केन्द्रका एक अधिकारीले जानकारी दिए ।