छाताको अभावले मिटरब्याज पीडितको काठमाडौं केन्द्रित मार्च प्रभावित, चपुरमै रोकिए

२९ असार, जनकपुरधाम । काठमाडौं केन्द्रित पैदल मार्चमा रहेका मिटरब्याज पीडितहरूको यात्रा वर्षाको कारण प्रभावित बनेको छ । आइतबार राति रौतहटको चपुर पुगेर धर्मशालामा रात बिताएका उनीहरू बिहान ५ बजे हिंड्ने योजनामा थिए । तर, रातिदेखि मुसलधारे वर्षा हुँदा र करिब १५० पीडितसँग छाताको अभावका कारण प्रभावित भएको मिटरब्याज पीडितकी अभियन्ता लक्ष्मी घिमिरेले जानकारी दिइन् ।

घिमिरेका अनुसार करिब १०० देखि १५० जना पीडितका लागि छाताको व्यवस्था हुन सके मार्च तत्काल अघि बढाइनेछ । उनका अनुसार टोलीमा रहेका केही व्यक्तिसँग मात्र छाता रहेकाले अधिकांश सहभागी वर्षामा निस्कन सक्ने अवस्थामा छैनन् । ‘हाम्रो समूहमा वृद्धवृद्धा बा-आमा पनि हुनुहुन्छ। उहाँहरूका लागि छाताको व्यवस्थापन गर्ने प्रयास गरिरहेका छौं, तर अहिलेसम्म पर्याप्त छाता उपलब्ध हुन सकेको छैन’, उनले भनिन् ।