इजरायलमा कामदार पठाउने काम कहिले सकिन्छ ?

गत वर्षको माघ ५ गते ९९ जना नेपाली (केयर गिभर) इजरायल उडे । इजरायलका स्याहार केन्द्रका काम गर्न छनौटमा परेका उनीहरू उडेको एक वर्ष पुग्नै लागेको छ । तर, छनौटमा परेका सबै नेपाली कामदार इजरायल जान पाएका छैनन् । छनौटमा परेका १ हजार १७५ मध्ये अहिलेसम्म १ हजार १९ जना कामदार इजरायल पुगेका छन् । जान बाँकी रहेका मध्ये केही मेडिकलमा फेल भए भने केहीले नजाने निर्णय गरे । अब ५० जना जति इजरायल जान बाँकी रहेको वैदेशिक रोजगार विभागले जनाएको छ ।

इजरायलबाट जति जनाको भिसा आउने गरेको सोही आधारमा कामदारलाई पठाउने गरिएको विभागका महानिर्देशक उमाकान्त आचार्यले बताए । ‘रोजगार दाताले म रेडी भए अब पठाईदिनुहोस् भनेर आयो भने मात्र पठाउनुपर्ने हो । ८६ जना रोकिएका थिए । अब ५० जना जति बाँकी छन् । एक महिनाभित्रमा सबै जना उड्छन् ।’ महानिर्देशक आचार्यले भने । अबको एक महिनाभित्रमा बाँकी रहेका सबै उडिसक्ने उनको भनाई छ । जति जनाको भिसा आउने गरेको त्यतिलाई नै इजरायल पठाउने गरिएको उनको भनाई छ ।